Michael Schumacher ka siguruar se do të heqë përfundimisht dorë nga pilotimi, pasi t’i japë lamtumirën Formula 1 në fund të sezonit. Shtatë herë kampioni i botës njoftoi në fillim të muajit tërheqjen nga Formula 1, pas kontratës 3-vjeçare me skuderinë Mercedes.

Fillimisht gjermani u tërhoq nga sporti në fund të sezonit 2006, por u rikthye me skuadrën gjermane në vitin 2010. Në kohën që ishte larg Formula 1, 43-vjeçari ka marrë pjesë në mjaft evente me motorrë, përfshirë këtu edhe kampionatin kombëtar gjerman të Superbike.

Megjithatë, kësaj here, Schumacher theksoi se nuk do të angazhohet më me të tilla kompeticione.

"Jo, nuk është në planet e mia. Formula 1 ofron maksimumin e emocioneve, shpejtësisë dhe kënaqësisë. Një makinë tjetër nuk do të më sillte të njëjtën ndjesi. Përfundimisht po e mbyll këtu", u shpreh 7 herë kampioni i botës.

Në vijim, mes humorit, do të shtonte: "Mendoj të përfshihem në gara me kuaj. Korina, bashkëshortja ime, ka vite që është aktive me këtë sport, ndërsa ka zgjedhur tashmë kalin e duhur për mua dhe nuk do hezitoj". /albeu.com/