Lewis Hamilton ka thurur elozhe për rivalin e tij, Fernando Alonso, për të cilin ka deklaruar se këtë vit e meriton titullin e kampionit të Formula 1. Alonso ka zbritur i dyti në klasifikimin e përgjithshëm pas gjermanit Sebastian Vettel, fitues i tri garave të fundit, duke e kthyer disavantazhin e 39 pikëve në avantazh të 6 pikëve ndaj spanjollit të Ferrarit.

Kur kanë mbetur edhe katër gara nga përfundimi i kampionatit botëror dhe ku Red Bull ka qenë i rivalizueshëm, shumë mendojnë se Vettel është në prag të fitimit të trofeut të tretë radhazi. Megjithatë Hamilton shpreson që kampion i trefishtë botëror të shpallet Alonso.

"Unë e ndjej që Fernando do ta meritojë nëse do të vlerësojmë të gjithë ecurinë vjetore. Skuadra e tij nuk ka bërë asnjë gabim. Ai mund të mos ketë qenë gjithmonë piloti më i shpejtë, veçse ka qenë protagonisti i Botërorit. Ai ka pilotuar si një kampion i vërtetë dhe ky është viti i tij dhe parashikoj që të shpallet ai kampioni i trefishtë botëror i Formula 1. Red Bulli ka pasur ulje e ngritje, por që nuk mund të mohohet puna e jashtëzakonshme që kanë bërë. Ata kanë fituar tri garat e fundit", dekalroi piloti i Vodafone McLaren.

Britaniku do të lërë Vodafone McLaren-in në fund të sezonit, pas nënshkrimit të kontratës trevjeçare me Mercedesin.

"Shpresoj të ngjitem në podium në garat e fundit, por në Kore nuk ishim mjaft të shpejtë", u shpreh Hamilton. /albeu.com/